宜家過時過節出街食飯，要搵好野食唔難，成家人坐得舒服唔俾人催就堅難。好似啱啱中秋節，等齊人開筷都差不多夠鐘交枱，黎緊仲有做冬、團年，不如用「戶戶送」將成枱廣東靚餸擺係屋企食啦。
1. 菠蘿彩椒咕嚕肉
過節唔想媽媽辛苦，又要滿足嘴刁嘅各位，「美味廚」選擇多到一圍枱都唔夠放，當中嘅「菠蘿彩椒咕嚕肉」絕對係個人喜愛之選。一口豬肉食得方便，炸漿皮夠薄，咬落鬆軟，菠蘿鲜甜，同個酸甜汁互相平衡，最啱大人細佬胃口，唔覺唔覺食完一碗飯。
2. 薑葱豬雜煲
內臟未必人人啱食，想試吓自己啱唔啱食，可以揀蔥爆，有鑊氣又惹味。七喜粥麵小廚嘅「薑葱豬雜煲」絕對無陣陣內臟「羶」味，蔥段同豬雜吸收哂d汁，配支大啤簡直爽。嫌太佬味，叫個白飯撈埋汁又得。
3. 焦糖雞翼
雞翼絕對係每個屋企必有嘅「傳統」小菜，「樂趣園」嘅「焦糖雞翼」絕對令我愛回家。焦糖烘到脆卜卜，甜甜黏黏糖漿滲左去雞翼皮同肉，香煎過嘅雞翼皮，再咬落帶有糖漿同雞皮油嘅果啖肉。今次「靚仔」（白飯）都唔要喇，成碟雞翼我嘅。
4. 正宗炭燒燒鵝
鏞記燒鵝咁出名，試問點夠膽係度班門弄斧扮食家，今次要sell 嘅係外賣餐單嘅選擇。咁出名嘅酒家，外賣可以揀平平地嘅燒鵝碟頭飯。嫌唔夠喉，成碟上都係合理價錢。仲有派對套餐，每個餐都有燒鵝，唔駛擔心得d小菜砌夠數無鵝食。hard sell 一句，記住柯打「正宗炭燒燒鵝」。
俾左咁多個選擇大家，黎緊餐做節飯唔駛頭痕啦。即刻用戶戶送或登入 Deliveroo.hk落柯打啦。
