如果有外國朋友嚟到香港玩我定會盡地主之誼帶佢去食好嘢，飲茶食點心幾乎係指定動作，但除咗正正經經坐喺度到食一餐之外，都可以散叫一啲中式美味小食友情客串一下！以下落嚟為大家介紹嘅無論係早、午、晚都可以隨時叫嚟食。
1. 鮑魚雞粒酥
位於尖沙咀嘅點一龍，店內嘅裝修係以現代中式格調為主。店內有紅紅大燈籠，光線，柔和有格調。 為你介紹嘅小食係鮑魚雞粒酥同埋養顏燕窩蛋撻。鮑魚嘅口感彈牙，味道又調校得啱啱好，淨係叫一隻嚟食肯定唔夠。相傳燕窩滋補養顏，特別受女士歡迎。姑且勿論係唔係真嘅，但係用咗上好嘅材料就已經值回票價。
2. 酥皮蛋撻
講開蛋撻，點可以唔介紹酥妃皇后啊！蛋撻呢啲咁地道嘅小食，全香港好多地方都有，但係位於九龍城酥妃皇后製作嘅蛋撻每一個都特別大個！點解？ 因為佢係用咗368層酥皮製成，無返咁大個點可以有368層吖！蛋撻有分餅皮同埋酥皮，而酥妃皇后做的酥皮非常鬆化又層次分明，裏邊嘅甜蛋唔會太甜啱啱好。話佢係酥皮蛋撻裏邊嘅皇后實至名歸。
3. 八味脆皮豆腐
豆腐呢一味食材係變化多樣，可以用來做主菜亦都可來做小食。 位於銅鑼灣富東海鮮酒家有一款八味脆皮豆腐， 用咗七味粉加上鹽，變成咗八味，而師傅處理嘅炸豆腐金黃香脆，外脆內滑，火喉調校得剛剛好。而正正因為炸脆嘅外皮保存咗熱力，入面仲係非常熱，食嘅時候記住要小心呀。
4. 肉燥麻辣炒藕條
如果係食得辣嘅朋友可以嘗試埋富東海鮮酒家嘅肉燥麻辣炒藕條。 肉燥和藕條用上麻辣醬一齊炒，嗰種又香又辣嘅味道， 最啱就係同汽水啤酒一齊當小食。
