食英國菜首推炸魚薯條，炸魚啖啖肉，啱晒鍾意食魚唔吐骨嘅人。以下介紹同樣係啖啖魚肉的菜式，不過採用唔同烹煮方法。英式、中式、泰式口味各具風格，仲唔快啲睇下邊款至啱胃口。
1. 英式炸魚薯條（觀塘）
就算炸嘢係熱氣啲，但講到食魚要啖啖肉，真係無可能唔食英式炸魚。My Burger唔單止漢堡出色，「英式炸魚薯條」都好有水準。火喉控制好，外層香口又唔太油膩，魚肉唔會乾晒，沾啲他他醬就仲好味。薯條都係即叫即炸，脆卜卜無過晒氣，熱氣到爆都忍唔住食晒全份。
2. 青芒絲伴筍殼魚（九龍城）
九龍城出名係小泰國，喺開心星期五，食番餐泰國菜，為週末掀起序幕。被譽為泰國國寶魚嘅筍殼魚，唔係每間泰菜餐廳都會有，小曼谷海鮮燒烤屋嘅「青芒絲伴筍殼魚」就不可錯過。筍殻魚肉多骨小，外層炸到酥脆，內裡魚肉保留鮮嫩多汁。泰式煮法拌以青芒絲，味道清新。
3. 籠仔梅子蒸大鱔（九龍城）
九龍城唔食泰菜，都有簡單高質家常小菜，例如連蔡瀾都推介嘅粗菜館。慣咗屋企食飯必定有魚，所以好快就舉手揀咗「籠仔梅子蒸大鱔」。話明係大鱔，鱔件大件肥美。唔用味道較濃烈嘅蒜蓉或豆鼓，而係用梅子蒸，微微酸甜，提味開胃，又唔會搶咗鱔件嘅鮮。畫龍點晴係用咗籠仔和荷葉墊底，增添淡淡荷葉香。
4. 椒鹽小黃魚（尖沙咀）
食魚唔鍾意食魚皮滑嘟嘟、又怕吐骨，偏偏對魚肉情有獨鍾。咁位於上海小南國1987就有嘢啱你。上海菜出色美味，當中「椒鹽小黃魚」的小黃魚猶如一對大手掌，炸得金黃香脆，表面撒上椒鹽，超香口惹味。重點係，魚皮和魚骨都炸得酥脆，食埋唔駛吐骨。
邊個鍾意食魚唔吐骨，立即用戶戶送app或登入 Deliveroo.hk，就食到啖啖肉嘅魚菜式。
